RSS

أوباما و نوبل






ف يوم الجمعه اللى فات أعلنت العاصمه النرويجيه فوز الرئيس أوباما بجائزه نوبل للسلام

حصوله على الجائزه كان يعتبر مفاجأه لكل العالم هو نفسه حتى اتفاجىء لما عرف انه حصل على الجائزه و قال انا أخذت الجائزه دى مقابل ايه ؟



ف رأيكوا هل فعلا يستحق انه ياخد الجايزه دى ؟



انا شخصيا شايفه انه ميستحقهاش صحيح هو قدر او حاول الفتره اللى فاتت انه يغير نظره العالم لامريكا و خصوصا المجتمع العربى و انهم مش هيدخلوا ف حروب تانى و يحاولوا يعيشو و يعيشونا احنا كمان ف سلام الا انه ف الاول و الاخر ده لسه مجرد كلام يعنى لسه الفعل مبدأش أو لو كان بدأ هيبقى بجزء صغير

يعنى مفيش انجاز مبهر عمله يستحق انه ياخد بيه الجائزه دى يعنى و خصوصوا ان فتره حكمه لم تتجاوز الشهور لحد دلوقتى



غير كده ان المرشحين للجايزه دى كان فى ناس عاملين مجهودات كبيره فعلا فى تحقيق السلام زى التحالف الدولى لمكافحه القنابل العنقوديه اللى نجح فى اقناع 100 دوله على التوقيع على معاهده بتحظر استخدام هذا النوع من القنابل

و فى منهم رئيس زيمبابوى اللى جازف بحياته اكتر من مره من اجل تحقيق السلام



يعنى انا مش فاهمه جايزه نوبل للسلام دى بيدوها للناس على اساس ايه بالظبط ؟

مش المفروض على الافعال و الانجازات و لا لمجرد ان حد يتكلم على انه عايز السلام يعم ف العالم

Happy feast


شهر رمضان عدا ف يومين و هل علينا العيد كل سنه و انتوا طيبين و بصحه و سلامه و يا رب يكون عيد سعيد علينا كلنا

ايه اخبار العيد و اخبار الكحك و البسكوت لسه بتعملو ف البيت و لا بتجيبو جاهز ؟ احنا السنه دى عملنا شويه ف البيت و اشترينا شويه

انا مسافره اسكندريه بكره يا ترى عندكو مشروع سفر و لا هتقضو العيد ازاى ؟


بدرى بدرى و الأيام بتجرى

باقى 9 أيام على رمضان يعنى احنا ف العشر الأواخر دلوقتى و أيام مباركه يارب كلنا نحاول نستغلها على قد ما نقدر و ندعى بكل اللى نتمناه و ان ربنا يدوم علينا الصحه و الستر و العافيه و ياريت تدعو ان ربنا يحمينا و يحمى مصر كلها من الأوبئه اللى داخله علينا دى و ان شاء الله ربنا هيستجيب لدعاءنا
ده دعاء جميل جدا للشيخ محمد جبريل قاله ف ليله القدر اتمنى انكو تسمعوه و تدعوا بيه
و كل عام و انتم بخير و اللهم بلغنا ليله القدر

7 رمضان


كان المفروض اعمل بوست ف اول شهر رمضان عشان اقولكوا كل سنه و انتوا طيبين و رمضان كريم عليكوا و بعدين أجلت البوست و فوجئت ان النهارده 7 رمضان دايما الشهر ده بيعدى بسرعه الصاروخ من غير ما احنا نحس

:)انا رأيى مش مشكله انه يعدى بسرعه بس اهم حاجه اننا نحاول كلنا نستغله على قد ما نقدر

كنت قاعده من شويه بفتكر رمضان زمان

ايام ما كنت ف ابتدائى كان رمضان ايامها بيجى ف الشتا و كان الجو تلج و كان ايامها طبعا ربنا هادينى و بنام بدرى على الساعه 10 مثلا و كانت ماما تصحينى بليل و انا برتعش من السقعه و متغطيه باللحاف و البطانيه و نايمه على بطانيه تانيه طبعا ده غير الميت حاجه اللى كنت ببقى لباسهم فوق بعض و الواحد يقوم بالعافيه من السرير عشان يتسحر و هو فاتح عين و قافل العين التانيه و كنت اشوف المسحراتى و هو تحت لابس الكوفيه و نازل ف عز المطر و الساقعه و الشارع هااااادى و مفيش حد خالص تقريبا الا هو و العربيات و الناس بسيطه جدا دلوقتى الحال اتغير خالص و معاد السحور ده الواحد بيبقى حاسس انه بيتسحر بدرى و لسه بدرى لما ييجى معاد نومه و طبعا الشوارع هيصه تحت و المسحراتى خلاص معدتش بشوفه

مهو اصل هيصحى مين بس ده الناس كلها ف الشارع


الحمد لله على كل حال :)

امبارح لقيت صور عجبيتنى على النت و حبيت اوريهالكوا

دى صوره جامع ابراهيم اللى عند محطه الرمل ف اسكندريه اكيد عارفينه دى صور من صلاه التراويح السنه اللى فاتت


ما شاء الله بجد لما شفت الصور دى انبسطت اوى و يا رب يكون السنه دى عدد الناس دى اكتر و اكتر :)


الحمد لله على نعمه الاسلام :)

أخر صورتين دول من عند الكورنيش لو لاحظتوا ما شاء الله :)


و دى صور تانيه لقيتها ف موقع الداعيه مصطفى حسنى عن الحاجات اللى مفروض نتجنب نعملها ف شهر رمضان





















اتمنى انى اكون مطولتش عليكوا و رمضان كريم :)


ورجعنالكم تانى




اول حاجه كل سنه و انتوا طيبين الشهر الكريم على الابواب و اللى بنستناه كل سنه و نبقى حاسين كده لما يجى ان ربنا هدينا و نبقى مرتاحين و مبسوطين ربنا يوفقنا و نقدر بإذن الله نعمل حاجه كويسه ف الشهر ده اللى بيجى مره كل سنه
دايما نقول من كتر حبنا لشهر رمضان ياريت السنه كلها رمضان كنت سمعت من حوالى اسبوع تعليق معز مسعود على الموضوع ده كان بيقول ان لو ده حصل حيبقى رمضان بالنسبه لنا حاجه عاديه جدا و مش هنحس انه شهر مميز و فى مننا مثلا فى بعض العادات مش بيحب يعملها ف رمضان كون ان رمضان يبقى طول السنه يبقى اكيد هيجى علينا وقت ونعمل العادات دى و مش هيبقى عندنا تشوق لاستقبال رمضان زى ما احنا نفسنا انه يجى دلوقتى و هنلاقى نفسنا ف الاخر محتاجيت شهر تانى عشان نقرب اكتر من ربنا و ننضف دماغنا
انا عجبنى رأيه جدا و اقتنعت بيه

بالنسبه للتوقيت الشتوى للى ميعرفش هيبدأ اول يوم ف رمضان يعنى لله ما هتظهر الرؤيه نأخر الساعه بليل
انا مش عارفه بصراحه التوقيت الصيفى دلوقتى بقى لازمته ايه ؟
يعنى فتره التوقيت ده كل مادا بتقصر عن السنه اللى قبلها عشان رمضان يعنى التوقيت ده هيجى عليه وقت و هيبقى مش موجود اصلا
او فترته هتبقى صغيره جدا
طب ميلغوه من دلوقتى و خلاص ؟
موضوع تانى



دكتور مجدى يعقوب

موضوع تانى حبيت اتكلم فيه انا عارفه انى بتكلم عنه متأخر بس هو انجاز رائع لازم اذكره وياريت بجد نهتم بالعلماء بتوعنا و نكرمهم و نقدرهم

للى مسمعش عن الانجاز بتاعه
: طفله اسمها هانا كانت معرضه للموت من اول يوم اتولدت فيه بسبب ان قلبها مكنش بيشتغل
كويس بمعنى ان معدل ضخ الدم منه كان غير طبيعى
و عضله القلب عندها كانت ضعيفه الدكتور مجدى استطاع مع فريق العمل بتاعه انه يزرعلها قلب تانى صغير بجانب قلبها الاساسى بحيث ان معدل ضخ الدم عندها يبقى طبيعى و بعد مرور سنوات و البنت كبرت القلب الاصلى بتاعها رجع لحالته الطبيعيه الحمد لله و بعدها شالوا القلب المزروع ده
يعتبر انجاز رائع و انقاذ لحياه طفله كانت اكيد هتموت
شكرا ليك يا دكتور مجدى دايما مشرفنا

اخر حاجه بقى ف البوست كنت عايزه اسئل عن حاجه
هى مدونه كلام من القلب بتاعه الدكتور عمرو فاروق راحت فين ؟
دى كانت من اكتر المدونات اللى كنت بحب افتحها دايما و اقرا مواضيعها بس انا لما جيت اشوفها لقيتها مش موجوده انا مش عارفه ده من زمان و لا لأ و ايه السبب ؟
انا استغربت بجد لانها كانت من اكتر المونات الناجحه ف عالم التدوين


اتمنى اكون مطولتش
عليكم و رغيت كتير

عوده بعد غياب طويل :(


مش متخيله ان اخر موضوع ليا كان ف شهر 3 !! بجد انا مش عارفه او مش لاقيه سبب واضح لغيابى عن البلوج الفتره دى كلها :( انا صح ف الفتره دى كان الترم الترم التانى لسه بادىء عندنا ف الكليه لان الامتحانات بتاعت نص السنه بتبقى ف شهر 2 و وقت الترم التانى كان صغير جدا و لقينا كل حاجه كبست فوق راسنا و الوقت عده صاروخ من غير منحس و الواحد كان نازل طالع بين الكليه و البيت و الكورسات و يمكن مكنش فى وقت حته الواحد يقعد مع نفسه بس ده ميمنعش برضه انى مكتش ف البلوج حاجه الفتره دى كلها و اخر بوست ليا قولت انا مش هسيب البلوج فتره طويله كده بس للاسف مكنتش عند وعدى
و مش عارفه فعلا السبب او المشكله كانت ف ايه و دى اكتر حاجه مزعلانى :(

وحشتنى مدوناتكوا جدا اللى فى منها كنت لازم ادخلوا اكتر من مره ف اليوم و اشوف ايه الجديد و اقرا المواضيع اللى فيها على طول
يمكن الناس اللى صاحبتهم من المدونات التانيه نسيونى بس انا عارفه انها غلطتى انا و بعتذر عن غيابى عن المدونه الفتره دى كلها و يا رب يكون اعتذارى ده مقبول


المهم الحمد لله الامتحانات عدت على خير و النتيجه طلعت و جبت امتياز انا بجد مبسوطه جدا و بشكلر ربنا على التقدير ده و ربنا يعدى بقى ال4 سنين الجايين على خير







و سافرت بعد الامتحانات اسكندريه انا بحب البلد دى اوى بالنسبه لى هيا احلى بلد ف مصلر و اكتر مكان لما بروحه بنبسط فيه عشان فيها ناس كتير بحبهم اوى و فيها اماكن كتير جميله اوى و الحمد لله قضيت فيها وقت جميل

بس انا لاحظت حاجتين ف اسكندريه

البلد جوها بقى حر و رطوبه بطريقه غريبه جدا يعنى من حوالى 4 او 5 سنين الجو مكنتش خنقه فيها اوى كده 1-



او على الاقل كان بيجى على العصر و الحر يفك لكن دلوقتى الحر طول الوقت و الرطوبه عاليه جدا

يعنى الواحد حتى لما بيمشى على البحر الهوا مش جامد زى زمان

2- تانى حاجه لاحظتها ان اسكندريه بقت زحمه اوى بطريقه مش طبيعيه يعنى مثلا شارع ابو قير بالذات على طول زحمه و العربيات واقفه فى شبه مش بتححر ك من مكانها و الزحام رهيب يعنى انا فاكره من 5 سنين فاتوا مكنش الشارع ده زحمه كده

غير كمان ان العربيات عددها بيزيد اكيد ف الناس بيضطروا ف الشوارع الضيقه يركنوا عربياتهم على الصفين و ده بيخلى سير العربيات صعب جدا ف الشارع و ياسلام كمان لو انت داخل شارع ضيق و العربيات راكنه من ف الجنبين و لاقيت عربيه مقابلاك ف وشك و من وراك جيش عربيات



انا بقترح لحل المشكله دى انهم يعملوا جراجات متعدده الطوابق لانها هتستوعب عربيات اكتر و الزحمه اللى ف ركن العربيات دى هتقل و المرور ف الشوارع هيبقى اسهل

و ياريت اى عماره جديده تتبنى يبقى فيها جراج خاص بيها

عشان نقضى عل المشكله دى خالص و اتمنى ان ده يكون حل كويس


فى حاجات تانيه كنت عايزه اتكلم فيها بس نا بصراحه كابس عليا النوم دلوقتى :D

و لازم ابص على مدوناتكوا فهلف فيها شويه و قريب ان شاء الله هكتب ف باقى المواضيع قريب
:)

و اتمنى مكنش طولت عليكو

وحشتووووووووووونى



وحشتووونى اوى :D


أخيرا رجعت البلوج تانى انا بجد مش مصدقه انى بكتب فيه دلوقتى و انى اعدت فتره طويله كده من غير ما اكتب ف البلوج حاجه و ازور المدونات التانيه بجدت وحشتنى بلوجات كتير اوى من زمان مدخلتش عليها بس ده كان سبب ظروف حصلت الفتره اللة فاتت و كمان طبعا ف كليتى الحبيبه كليه الطب كانوا عاملين امتحان نص السنه بعد اجازه نص السنه و انشغلت بالمذاكره اللى فاتت و سفر و حاجات كتير حصلت

المهم انا مبسوطه انى رجعت تانى و خلاص مش هسيبك تانى يا بلوجى و متزعلش منى

:D

حصلت حاجات كتير اوى لفتره
اللى فاتت ان كان ف مصر او ف غزه او ف امريكا و يمكن فيا و فيكوا انتو :D

انا مش حبه انى اتكلم ف حاجه دلوقتى بس اتمنى ان الايام اللى جايه تكون احسن من اللى فاتت و ان ظروفنا تتحسن و ربنا يوفقنا لكل خير
اتمنى تكونوا انتوا كمان بخير و كويسين
و هرجع الف تانى ف مدوناتكوا لجد ما تزهقوا منى اطمنوا
:p :D

فى مناسبه جميله قربت حبه انى اتكلم عنها و هى عيد الام

انا عارفه ان فى بعض الناس مش بتحب انها تحتفل بيه و البعض حرم الاحتفال بيه

بس انا شخصيا بحب احتفل بيه مش معنى كده انى هعامل مامتى كويس يوم واحد ف السنه او انى لو كنت بعيده عنها مش هزورها غير ف اليوم ده زى ما فى بعض الناس بتعمل

بس انا بشوفه فرصه كويسه لينا اننا نحتفل بمامتنا و تحس ان احنا مقدرين مجهودها معانا و انها بالنسبه لنا حاجه كبيره اوى و فرصه لو كان فى حد ينا على خلاف مع مامته انه يتصالح معاها و اكيد مامته مش هتصده
و نجيبلها هديه جميله م شرط تكون هديه كبيره و غاليه ممكن نجيب ورد او كارت
و لو انت معاك فلوس كتير اكيد مش هتستخصر يعنى و لا ايه ؟ :D

انا عن نفسى بحب أسال ماما عن الحاجه اللى هى عايزاها و أجمع فلوس و اجيبهالها عشان ابقى جبتلها الحاجه اللى نفسها فيها و محتجالها

:)

انتوا بقى ناويين يجيبوا ايه لمامتكوا ف عيد الام ؟