RSS

التهاب الملتحمة




مش عارفه ايه سبب التضخيم الاعلامى ف التلفزيون و ف الصحف اللى حصل على المرض ده لدرجة انه كان بينزل العنوان الرئيسى لبعض الصحف ؟!!!! انا بقيت بحس ان الاعلام ما بيصدق يلاقى اى حاجه تحصل و هاتك يا تضخيم و كلام ف الموضوع للصبح !!!
المرض مرض بسيط جدا و اتفه ما يكون و جالى قبل كده كذا مره مجرد بيتعالج بقطره مضاد حيوى و غسل العين باستمرار و استعمال فوطة شخصيه عشان الشخص ميعديش الناس اللى حواليه و ممكن معاها كمادات مايه دافيه على العين و خلاص بيخف و الموضوع منتهى على كده و نادر جدا لما بتحصل عليه مضاعفات خصوصا حتى ان الحالات اللى كانو جايبنها ف التلفزيون كان الاحمرار اللى ف العين منها بسيط جدا
و كون ان المرض ينتشر بطريقه ملحوظه ف ده لان الفيرس انتشر ف الجو ف كذا حد اتصاب بيه و ف خلال فتره صغيره عدد الحالات هيقل بالتدريج لحد ما يختفى او يوصل للمعدل الطبيعى زى بالظبط البرد لما بيزيد ف الشتاء و يقل ف الصيف

و مش محتاجه يعنى اننا نرعب الناس فكرتنى باللى الاعلام عمله ايام انفلونزا الخنازير
المرض فحد ذاته مش محتاج عليه كلام كتير و لا محتاج كل التضخيم اللى حصل ده
غير بس اننا نوعى الناس متستخدمش نفس فوطة المصاب عشان متتعديش

انا شايفه ان اللى محتاج نتكلم عليه هو السبب الرئيسى ف انتشار المرض الفتره دى( حريق قش الرز) المشكله اللى بقالها اكتر
من 10 سنين و مفيش اى حل بنشوفه ليها خالص كل سنه يقولك كل محافظه بتعمل اجتمعاتها و بتبذل اقصى مجهودها للقضاء عليه و بيتضح طبعا ان مفيش اى حاجه بتحصل لان الحريق يمكن بيزيد كل سنه عن السنه اللى قبلها
و كل السنه الناس تتعب و يتكتم نفسها و يجيلها برد وربو شعبى بالاضافه لالتهاب العين واللى متأكده انه بيحصل كل سنه و ف الوقت ده بسبب التلوث و الدخان يعنى ده مش مرض جدت علينا السنه دى مثلا و لا حاجه و لو كانت زادت ف ده اكبر دليل على ان المشكله بتسوء سنه عن سنه
و طبعا الفلاحين بيضطروا انهم يحرقوا هيودوه فين اذا كان محدش بياخده منهم و بيمنعوهم انهم يحطوه ف البيوت
ايه المشكله ان كل سنه بعد حصاد الرز يعدوا على الفلاحين ياخدو منهم القش و نصنع بيه حاجه مفيده
زى الخشب و الورق و العلف و ممكن كمان يعمل وقود عضوى زى الميثان؟!!!!!
على الاقل حتى لما نصنع العلف عندنا يرخصنا سعر الفراخ و اللحمه اللى بيقولو ان من سبب ارتفاع سعرها هو ز ياده سعر العلف