دايما وانا بتفرج على برنامج او اخبار مثلا االاقى المراسل واقف وحوالين منه100 وش
اللى باصص للكاميره وعمال يضحك زى الاهبل واللى بيعمل للكاميرا باى باى واللى رايح جاى ورا المذيعه واللى ولقف كده وخلاص علشان يطلع ف التلفزيون الصراحه المنظر بيبقى مش ظريف خالص الحاجه الغريبه ان اللى واقفين بيكونوا من مختلف الاعمار يعنى لو مثلا كان اللى واقفين اطفال بس كنا قلنا ماشى معلش دول اطفال ولسه صغيرين لكن الكل واقف يعنى مثلا طفل عنده 5 سنين واقف وبيعمل باىباى وجنب منه راجل عنده سبعين سنه و واقف يضحك للكاميرا وساعات بقى بيكون الوقت مش مناسب خالص يعنى انا فاكره مثلا ايام الانتخابات والمذيعه واقفه قدام باب اللجنه والناس برضه حطين وشهم فى الكاميرا هو انتوا رايحين تنتخبوا ولا رايحين علشان تطلعوا فى التلفزيون وساعات بيكون فى حادثه والمذيعه حواليها خرابه ودمار والناس برضه سابت الكارثه وواقفه تبص للكاميرا
مش المنظر برضه بيكون اهبل وعبيط ولا انا كلامى غلط واللى بيحصل ده عادى؟؟؟
اهبالمناسبه انا هروح اسكندريه اسبوع كده وبعدين هرجعلكوا تانى هتوحشونى:)
سلام
15 comments:
تعرفي بجد الموقف احيانا بيستفزني ,وبسأل هما عمرهم مشافوا كمرا وتليفزيون وتلاقي الواحد هيمووت عشان يبان في الكمرا ويظهر في التليفزيون حاجه تنرفز
اتمني لكي وقت ممتع ومفيد في اسكندريه دي بجد تحفه
تحياتي لكي وترجعي بالسلامه
نسيت اقولك عاوزك تجيبيلي معاكي هريسه
طب كويس ان الموقف طلع مش بيستفزنى انا بس وبيستفز برضه ناس تانيه على رايك مشافوش قبل كده تلفزيون
اطمن الهريسه موجوده
سلام
ايه الحكايه يا واحد انت جايب سيره الهريسه دى فى كل حته وفى الاخر مش شايفين منك حاجه
نفرتيتى ازيك معلش لازم اغلس على واحد
المهم انا معاكى ان المشهد المتكرر ده اهبل وعبيط فعلا
لانه بيدل على اننا وصلنا لدرجه من الهيافه ملهاش حل
تحياتى يا جميله
فعلاً منظرهم بيبقى غبي!!!
شكراً..
محمد المصري
شكرا يا شمعه انا معاكى فعلا ان احنا بقينا هايفين اصل الناس مش لاقيه حاجه تعملها
يظهر ان واحد بيحب الهريسه:)))))))
سلام
محمد المصرى
اهلا بيك ده اول كومنت ليك ف مدونتى
فعلاً وأتمنى ميكونش الأخير بإذن الله..^^
شكراً..
اهوا االناس وهيا ماشية بتحاول تبتسم لأي حاجة ..تغيير برضه..صحيح منظر أهبل بس أنا بحب اتفرج عليه..يمكن عشان أنا اهبل زيهم0
تصدقي نفسي اعرف هما ليه بيوقفوا كده يعني ويفضلوا يعملو باي لمين برضه مش عارفة
تروحي اسكندرية وترجعي بالسلامة :)
يا جماعة الناس غلبانة عايزة تفرح بطلعتها في التلفزيون بس المفروض اللي يقف يقف بأدبه لا يشاور و لا يزاحم و لا يعمل باي
انما المنظر الغريب اللي بيبقى حوالين أي كاميرا بيقى مستفز فعلاً
طب أقولكوا حكاية تبع نفس الموضوع
أنا مهندس مدني و كان مطلوب مني الرفع المساحي لمناسيب و ارتفاعات الأرض الطبيعية و الشوارع في منطقة شعبية و كلها حواري و أزقة في قلب دمنهور القديمة علشان بنخطط لتغيير شبكة المياه بالكامل و تركيب مواسير جديدة أكبر و أحسن
المهم جهاز الميزان المساحي يشبه الكاميرا
تلسكوب في وضع أفقى تماما مستقر على حامل ثلاثي الأرجل
مفيش حتة ننصب فيها الجهاز و نبتدي ناخد قراءات الا و تلاقي عيال الحارة و الحارات المجاورة اتلموا علينا و عايزيين يطلعوا في الصورة
دا غير الناس الكبار اللي معدية و بتسأل بأدب كاميرا دي يا ابني
لا يا حاج
امال ايه
فأضطر أشرح له احنا بعمل ايه
غير مرة واحدة صرخت من شباك مرة بعلو صوتها بتصوروا البيت ليه؟
عايزين تهدوه
لا يا حاجة دا شغل للمية
ما يلزمناش احنا عندنا و كويسة و مش عابزين
ربنا يكون في عون الكاميرا مان و كل المشتبه بوجود كاميرا معاهم
و آسف للتطويل
اسفه على الغيبه الطويله الاول
محمد المصري مستنيه ردك على مواضيعى القادمه ان شاء الله
احمد المصري
ممكن فعلا الناس تكون عايزه تبتسم او تفرح لكن محبكتش يعنى يقفوا قدام الكاميرا كمان زى مقلت ساعات الوقت فعلا بيبلقى مش مناسب خالص زى مثلا لما بيكون فى حادثه برضه الناس واقفه منبنسمه وتضحك حاجه غريبه مش كده
NOURAN
نوران ازيك انا من زمان وانا نفسى تعلقى ف بلوجى اهلا بيك انا بحب البلوج بتاعك اوى يمكن مش بعلق فى قبل كده عشان مكنتش بلوجر سلام
مهندس مصري
بصراحه بقى ولا بادبه ولا مش بادبه انا رايى انهم يحترموا الكاميرا وميقففوش قدامها
وزى الحكايه اللى انت بتحكيها طبعا كل لما تروح خته تلاقى الناس حواليك وطبعا مش عارف تشتغل وطبعا كل واحد لازم يعرف بالتفصيل ايه اللى انت شغال بيه ده وطبعا الست لازم تعرف انت بتصور بيتها ليه وتتخانق معاك يلا على العموم ربنا يسهللك شغلا ويوفقنا كلنا ان شاء الله
وشكرا على تعليقك
سلام
السلام عليكم
نيمو
ازيك وازاى اسكندرية على حسك
والله يا بنتى المنظر اهبل فعلا
بس انا اعتقد دا كان زمان
دلوقتى الناس بقى عندها وعى وكبرت
ربنا يهدى
بطلى شقاوة فى اسكندرية وتعالى اتشاقى علينا تانى
سلامات يا دكترة
ازيك يا حدوته واحشانى انا حيت النهرضه بس والله يا حدوته لو فتحت الاخبار هتلاقى برضه الناس واقفه
سلام
Post a Comment