Im back again :)

اسفه جدا على التاخير اللى حصل ده انا السنه دى مكتبتش ف البلوج حاجه انا مش هجيب اعذار انا عارفه انه اهمال منى يا ريت تسامحونى :(

عايزين نعيش ف الفريزر
عمرنا مشوفنا حر اد الحر اللى شوفنا السنه دى !! الواحد مجرد ميطلع راسه من الشباك ف البيت يحس ان راسه استوت بجد لازم يبقى فيه حل للموضوع ده و يبقى فيه قوانين صارمه ف العالم كله عشان نسبة التلوث اللى بتزيد يوم عن يوم دى تقل شوية و الحر ده يفك علينا او يقل حتى - درجه الحراره ف موسكو اللى ف شمال اوروبا اللى المفروض انها تلج وصلت ل 35 !!! الناس اللى عمرهم مشافو الصيف و متعودين ع الساقعة دلوقتى هيفطسو م الحر و المراوح عندهم خلصت و عايزين يستوردو تكييفات طبعا مكنوش بيجيبوها قبل كده لانهم مكانوش
محتاجينها
ربنا يستر علينا

سواق التاكسى و العلم
من كام يوم كنت راكبه تاكسى كان الجو حر جدا و كنت واقفه ف الشارع مش طايقه نفسى بعد ما ركبت الراجل بيقولى مش عارف الناس مالها ماشيه مكشره كده ف الشارح ضحكت و قولتله ازاى مش عارف مش شايف الحر اللى احنا فيه ليهم حق طبعا يمشو متنحين و مكشرين قالى و الله الحر و الفقر هدو الناس و معدوش طايقين نفسهم و قعد يتكلم ف حاجات كتير ع الزحمه و المرور و ع الناس و الانتماء لمصر مكنتش مركزه معاه لانى تقريبا كنت نمت من كتر التعب المهم لقيتو رجع بالكلام على ايام ماتش مصر و الجزاير لما كنا كلنا حطين اعلام مصر ف البلاكونات و التاكسيات و عل المحلات و كل حته و كان منظر جميل و الكوره كانت مجمعه الناس كلها بيقولى ابص الاقى فلاح راكب على حمار و حاطط علم مصر عليه بيقولى زعلت و قولتله بقى كده علم مصر يتحط على الحمار برضه قالو و ايه المشكله هو يعنى كان حمار من الجزائر ساعتها فضلت اضحك قولتله بس برضه ايه المشكله يعنى يكفى ان الراجل فرحان و نفسه ان بلده تكسب وبعدين حتى بعد ما نزلت قولت احنا فعلا ممكن فينا اللى يضايق و يقول دى اهانه لبلدنا و ممكن حد تانى يضحك على الموقف زى ما انا ضحكت لما سمعته بس انا بقول يعنى الفلاح ده راجل بسيط و غلبان و بالنسبه له الحمار ده حاجه مهمه ف حياته و بيركبه كل يوم و بينقل عليه الخضار و الحاجات بتاعته فهو حس ان الحمار ده حاجه كبيره عشان كده حط العلم عليه ده رايى يعنى وبغض النظر هو حطه على ايه يكفى ان ده موقف يثبت ان المصريين بجميه فئاتهم بيحبو بلدهم مهما شتمو فيها :)