حكايه فانوس رمضان

رمضان كريم عليكوا كلكوا و يا رب كده نستفاد من الشهر الكريم اللى بيعدى زى الصاروخ

اكيد طبعا كلنا بنحب الفوانيس ومنكم بيجيبها لحد دلوقتى او لاخواته او بيعلقها او كان بيجيبها وهو صغير و يتسلى بيها وفى فوانيس بكل شكل ولون اللى بشمعه واللى بينور واللى بيقول بابا فين واللى بيغنى اغانى كتير ووحوى يا وحوى واللى على شكل بكار واللى على شكل مصباح على دين و حاجات تانيه كتير

لكن هل انتوا عارفين ايه حكايه الفوانيس دى واتعملت امتى وازاى؟

مصر تقريبا هى اكتر دوله بتستخدم فانوس رمضان وده عندنا تقليد من ايام العصر الفاطمى كان الفانوس بيعملوه نحاس ويحطوا جواه شمعه او يعملوه من الصفيح او الزجاج وكان شكل الفانوس محدود لكن دلوقتى اغلب الفوانيس بقت بلاستيك وبالبطاريه واشكالها كتيره وكان الاطفال زمان بيحبوا جدا الفوانيس خصوصا لانها كانت مصدر للاضاءه عشان مكنش فيه كهرباء وكان الاطفال بيجمعوا بليل ويلعبوا بالفوانيس ويغنوا بقى وحوى يا وحى على حلو يا حلو

اما عن اصل حكايه الفانوس فليها اكتر من قصه1- بيقولوا زمان ان الخليفه الفاطمى كان بيطلع عشان يستطلع رؤيه هلال شهر رمضان وكان الاطفال بيمشوا قدامه ينورولوا الطريق بالفوانيس عشان يشوف وعندما كان يرى الخليفه الهلال كان الاطفال بيفرحوا كتير ويهللوا ويغنوا لشهر رمضان

2- فى ناس تانيه بتقول ان الخليفه الفاطمى كان بيحب تبقى الشوارع منوره طوال شهر رمضان فطلب من الجوامع كلها انها تعلق فوانيس

3- وفى ناس تانيه بتقول ان النساء زمان مكنش مسموح لهم بالنزول الا ف رمضان فكان يخرج غلام امامهم حاملا فانوس لينير لها الطريق و لكى ينبه الرجال ان هناك سيده تسير فى الطريق فكانوا بياخدوا راحتهم

وفى حكايات تانيه كتير لو حد عارف منهم حاجه يقولى

بس مهما كان اصل الفانوس فهو هيفضل تقليد جميل ونعلقوا ف شهر رمضان والاطفال بيلعبوا بيه فى الشوارع والبيوت والمطاعم وف كل حته

قولولى بقى اشتريتوا السنه دى فانوس ولا لأ؟:)))

مصدر المعلومات

hellmakers.com